Ni 27/10/2022 a YMA Rorel Inkhawm, Thingsulthliah Playground ah neih zawh takah khan, kan Branch aiawha Palai heng mite hi an tel-

1. Pu F. Zakhuma, Sr. Adviser
2. Pu Pc Zodinmawia, Vice president
3. Pu Vanlalthara Ralte, Finance Secretary
4. Pu Lalremliana, Secretary

YMA ROREL INKHAWM VAWI 3-NA

Khuangchawi thla ni 27, 2022 (Ningani):
Vawiin chawhma dar 10:30 ațang khan YMA Rorel Inkhawm vawi 3-na chu Zawlbuk Group YMA ten Thingsulthliah Khelmualah Zawlbuk Rún (Pandal) sâ in an thleng a. Rorel palai 1452 an kal.

Pu R. Lalngheta, President Central YMA chuan rorel inkhawm hi a kaihruai a, Pu R. Lalchhandama, CEC chuan hunserh hmangin, Pathian hnenah meeting a hlan.

Member boral sûnna:
YMA General Conference 2021 ațanga YMA Rorel Inkhawm 2022 chhunga YMA Member boral 1347 sûnna hun Pu RL Zomawia, CEC kaihhruainain hman a ni a. Central YMA Zâipawl-ten member boral sûnna pualin hla an rem a, Member boral sûn zîngah hian Central YMA, Sub-Hqrs, Group leh Branch hruaitu lo ni tawh te pawh an tel a ni.

Report:
Prof. Lalnuntluanga, General Secretary Central YMA hnen ațangin YMA General Conference 2021 ațanga YMA Rorel 2022 inkâra Central YMA hmalâkna hrang hrang ngaihthlâk a ni.

Finance Report:
Pu Roneihthanga, Finance Secretary Central YMA hnen ațangin kum 2021-2022 chhunga Central YMA Sum dinhmun report ngaihthlak a ni a, hetiang hi a khaikhawmna a ni:-
Opening Balance :
₹2,72,36,187.62
Income :
₹2,52,76 412.00
Total :
₹5,25,12,599.62

Total Expenditure :
₹1,80,70,265.00

Closing Balance :
₹3,44,42,334.12*

ROREL:
Chairman kaihhruaina hnuaiah Agenda hrang hrang rel chhunzawm niin a hnuaia mi ang hian rel a ni.
YMA Khawih

1. YMA General Conference tih țhin chu ‘YMA Inkhawmpui Lian’ tia hming thlâk ni rawh se tih chu pawm a ni.
2. Eirukna leh hlemhletna a reh theih nan Central YMA in tun aia chak zawkin hma la rawh se tih chu pawm a ni.
3. General Conference/ Rorel Inkhawm pualin YMA Member tinah ₹5/- khawn ve țhin ni tawh rawh se tih chu pawm a ni.
4. Hnamdang hnenah In hmun/ huan/ lo/ ram lei leh hralh/ hlanchhawn zel a nih loh nan Mizoram chhunga In hmun/ huan/ lo/ ram hralh leh hlanchhawn a nih dawn reng rengin, YMA hriatpuina tel zel a nih theih nan Central YMA in chak takin hma la rawh se tih chu pawm a ni.
5. YMA chetvelnaa hliampui tuar/ nunna chân an awmin Central YMA-in țanpuina/ râlna pe țhin rawh se tih chu pawm a ni.
6. Sawrkar ațanga lehkha leh form fill-up tur Mizo țawnga tih chhuah a nih theih nan hma lak ni rawh se tih chu pawm a ni.
7. Zonun zemawi uar zawka in zirtir dan kawng zawn ni rawh se tih chu a thu siamremin ‘Zonun zemawi uar zawka in zirtir ni rawh se’ tiin pawm a ni.
8. Țhangtharte zingah Mizo țawng hlutna tlahniam zel tih tawp a nih theih nan leh Mizo țawng dik hman a nih theih nan theihtawpa hmalak ni rawh se tih chu pawm a ni.
9. Mizoramah hian Land Reform kalpui a nih theih nan Central YMA-in hma la rawh se.
10. Mizo hnuchhamte hnamdangin fa-a an lâk loh nan YMA-in hma la rawh se tih chu pawm a ni.

Sawrkar Khawih

1. Mizoramin Market Regulation kan neih theih nan hmalak ni rawh se tih chu siamremin ‘Mizoramin Market Regulation’ kan neih hi a taka kal pui a nih theihnan hma lak ni rawh se tih chu pawm a ni.
2. Mizoram mipui ten țangkai zawk leh awlsam zawka kan chhawr theih turin, Mizoram hmun hrang hranga sawrkar damdawi In te hi hmanraw țha zawk leh thawktu tam zawkin sawrkarin thuam țha rawh se. A enkawl kawngah pawh tun aia khauh zawk leh tha zawka kal pui ni rawh se tih chu pawm a ni.
3. Myanmar ațanga raltlante, hmun hrang hranga awm darh hian harsatna lian zawk min la thlen thei dawna a lan avangin, Sawrkarin Relief Camp changtlung zawk siam tur leh chu miah chuan dah vek tura hma la turin sawrkar lamah Central YMA-in hma la rawh se tih chu pawm a ni.
4. Mizoramah Vocational Course zirna hi tun aia uar zawka kal pui ni rawh se tih chu pawm a ni.

Dan Bu ennawn:
Rorel zawh hian YMA Dan Bu ennawn a ni a, kum nga dana ennawn țhin YMA Dan Bu hman lai mêk chu ennawn rawtna hrang hrang lût ațangin a ennawn tura ruat ten an thlitfîm hnu-ah rawtna hi pharh a ni.

Budget:
Pu Fabian Lalfakawma, Treasurer Central YMA chuan Central YMA Budget 2022-2023 ruahmanna a pharh a, kum 2022-2023 Central YMA Budget atan ₹1,68,80,400.00 pharh a ni a. He thu buatsaih lai hian pawm a nih leh nih loh hriat theih a la ni lo a ni.

Rorel palaiten zanin tlai hian zanriah an kil ho ang a, zaninah Vantlang Inkhawm buatsaih a ni leh a ni dâwn a, zanin inkhawm ban hian YMA Rorel Inkhawm vawi 3-na chu a țiak ang.

YMA Rorel Inkhawm hi General Conference neih loh kuma neih țhin a ni a, rorel palai te chu –

1. Central YMA Office Bearers;
2. Central Executive Committee Members;
3. Central YMA Office Bearer lo ni tawh te;
4. Sub-Headquarters Office Bearers;
5. Sub-Headquarters Executive Committee Member 10
6. Group YMA aiawh mi 6
7. Branch YMA aiawh mi 6 te an ni.